「我可能沉咗你」

約會後Gina喺TG度建議小弟可先嘗試約其他人了解自己係咪己經沉船，但其實小弟約Faye已經試過。雖然盡量理性咁同佢分析自己嘅諗法同行為，但腦海仲係不停諗住Elsa。

喺約Gina嘅第二朝，小弟再喺TG問Elsa嘅身體狀況，但佢整日都冇回覆，當時諗係咪小弟太chur， 令佢避開小弟。喺日頭有其他嘢做仲可以分散注意力，但到夜晚瞓喺張床度，個腦就不停諗，結果輾轉反側咗成晚瞓唔到。由於小弟係一個飯可以唔食，但覺唔可以唔瞓嘅人，面對呢個失眠問題，小弟決定約Elsa出嚟講出自己嘅感覺，求個解脫。

第二朝一早就喺TG話想約佢weekday出嚟食飯，冇幾耐Elsa就覆我話可以，由於想盡快解決，小弟乾脆約咗當晚。而喺約會前，小弟喺TG同Gina講咗自己嘅決定，佢好支持亦比咗啲意見，但佢問小弟想之後點，嗰一刻小弟唔識答，因為完全冇諗過，最後覆佢話自己純粹自私，只想講出感受，唔駛再亂諗，冇諗過同Elsa嘅關係會有咩改變。而小弟亦同Gina講，最理想嘅係Elsa對我冇感覺，當呢段關係要完結時小弟亦只需要處理自己嘅情感。
當晚見到Elsa，第一件事問佢身體仲有冇事，而佢都好得七七八八。坐底點菜，佢又運用佢嘅嗲功同侍應落單，依然係之前嗰個開心，玩得嘅小女孩，不過當小弟問佢最近喺約會平台嘅一啲轉變時，佢就講咗一啲近排唔如意嘅事，呢次係小弟第一次感覺到佢嘅負面情緒。即使之前佢有講過唔開心嘅經歷，情緒都冇受影響，但呢次可能剛剛發生，Elsa嘅情緒係有被帶動。
約會氣氛因為咁有啲改變，亦係第一次喺有啲凝重下進行，而小弟亦係Elsa口中了解到佢嘅另一面。小弟係一個唔會表露自己情感嘅人，會為自己預設最差情況去減低傷害。而Elsa，小弟覺得佢係用開朗，玩笑去掩蓋自己嘅負面情緒，佢話鍾意人讚，係因為佢自悲。
係呢種氣氛下，小弟亦不期然同Elsa講咗一啲以往小弟情緒失控嘅經歷，除咗當時人，基本上小弟都冇同其他人提過。小弟考究唔到Elsa將幾多心入面嘅嘢同小弟講，但喺嗰一刻，小弟就將好多冇同人講過嘅感受，諗法同咗佢講。
Elsa：「其實心理醫生最幫到我嘅就係開一啲藥可令我昏昏慾睡，令我唔會失眠。」
小弟：「講開失眠，其實我呢排都有呢個問題，尋晚由三點幾眼光光到天光。，」
Elsa：「？？」
小弟：「我成晚都喺度諗，我可能沉咗你。」
Elsa：「⋯會唔會你只係鍾意，而唔係沉呀，我都會鍾意你㗎。」
其實小弟真係唔識分鍾意定沉，小弟：「可能係，唔知道，之前有冇約過你嘅都係咁？」
Elsa：「應該唔會係囉。」
因為冇乜期望，呢一刻，小弟反而覺得輕鬆咗，又或者如Elsa所講人，小弟只係鍾意加少少日思夜想。為免氣氛尷尬，小弟將話題啦開：「其實呢段時間瞓唔到，幫我可以早啲起身跑步，你知唔知朝早跑步係比其他時段好…」
果一刻，留意到Elsa反而有啲眼泛淚光，小弟摸一摸佢個頭，同佢講有咩唔開心可以搵小弟，Elsa:「唔洗，你唔需要對我咁好。」小弟知道自己並唔係佢需要嘅人，而佢亦唔想情感勒索小弟，為免氣氛尷尬，大家都將話題拉得更開。