丈夫包養PTGF港媽打百針受孕坐月發現
一名港媽於香港網上討論區發文大吐苦水，指自己近年為誕第二胎多次接受人工受孕，今年終成功懷孕並順利產子，未料坐月期間發現老公自2年前已長期包養PTGF（part-time girlfriend，兼職女友），事主為此質問丈夫，惟對方在「證據確鑿」下仍矢口否認，令她坦言對這段婚姻感到後悔，卻不知如何是好，尋求網友幫助。
一名約30歲的港媽周日（20日）以「發現老公搵PTGF開房」為題，在網上討論區「親子王國」發帖，表示自己跟丈夫為了誕第二胎，於近年多次接受體外人工受孕，形容「夾埋打咗超過100支針」，至今年終成功懷孕並順利產子，未料在坐月半個月後，事主發現老公自2年前已長期包養PTGF，令她大感無助。
事主透露，她從丈夫的手機訊息中，發現對方自2018年開始找PTGF「開房」，更要求長期包養對方；他其後轉用Telegram繼續尋找PTGF，並設定密碼以免被妻子發現。事主隨後直接質問丈夫，對方矢口否認，辯稱「係同事用佢電話玩」。對於老公的回應，事主無法接受，
「對方問佢拎微信，佢係畀自己微信帳號，證據確鑿，我好肯定係佢本人，佢仲發難話『你唔信我都無計』。」
被「斷正」仍講大話怪責妻子
事主表示，她起初選擇跟丈夫結婚，全因對方外表「老老實實，唔靚仔唔高」，看似不會「偷食」，沒想到他還是出軌，「斷正」時仍講大話「扮無嘢」，甚至怪責妻子不信任他。她坦言對這段婚姻感到後悔，對丈夫亦倍感陌生，形容對方「真係好恐怖」，
「我覺得自己真係好傻、好白癡，以為有幸福日子過，點知BB出世半個月就畀我發現啲咁嘅嘢，而家我仲坐緊月，身體仲好虛弱，我真係唔知點算好，個腦一片空白……
曾歷宮外孕小產 丈夫出軌致夢碎
事主其後補充，指自己從未忽略丈夫，二人一直有進行房事，自誕下第一胎後恩愛非常，經常帶小孩到處遊玩，並計劃為孩子多添一名弟妹，惜努力多年仍沒有好消息，甚至曾經歷宮外孕、化學懷孕、小產，至現在終於實現多年夢想，當事主以為自己最幸福的時候，卻面對丈夫出軌的噩耗，
「我真係傷心到極點，無諗過一個平時準時返屋企、周末會陪小朋友出去玩嘅人會係咁。如果我早啲發現，我唔會做體外人工受孕咁傷身，唔使搞到而家咁……」
為兩孩著想未敢離婚
事主表示自己事後失眠且茶飯不思，只能勉強飲湯，亦要在陪月員面前裝成若無其事。她指自己具經濟能力，直言「好想離開」，但不希望兩孩自幼在單親家庭長大，令她頓覺不知如何是好，
「我真係唔知原唔原諒到，成件事仲未消化到。以前發過誓話如果佢背叛我就一定會離婚，而家啱啱生完BB仲喺好幸福嘅氣氛當中，一下打咗我入地獄，真係好痛苦……」
網民：為咗BB要收起眼淚
不少網民看到帖文後，均對事主的處境表示同情，著她先照顧好身體和孩子，再向家人求助，「你現正坐月中，情緒健康好重要。如果無人傾到的話，建議你去搵專業人士幫手」、「我覺得如果佢肯認的話都仲可以大家傾下，連認都唔肯認仲要發爛渣，真係好難令人想去原諒佢」、「你而家為2個小朋友好好坐月先，其他乜嘢都唔好諗住，養好身體再作打算」。
